കൊച്ചി: കളമശ്ശേരിയില്‍ പഴകിയ മാംസം പിടിച്ച സംഭവത്തില്‍ ഇടപെട്ട് ഹൈക്കോടതി. വിഷയത്തില്‍ അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ ലീഗല്‍ സര്‍വീസസ് അതോറിറ്റിക്ക് (കെല്‍സ) രജിസ്ട്രാര്‍ നിര്‍ദേശം നല്‍കി.
സംഭവത്തെക്കുറിച്ച്‌ കെല്‍സ കളമശ്ശേരി മുനിസിപ്പാലിറ്റിയോട് റിപ്പോര്‍ട്ട് തേടിയിട്ടുണ്ട്.
നഗരത്തിലെ ഹോട്ടലുകളില്‍ ഷവര്‍മയയടക്കം ഉണ്ടാക്കി വിതരണം ചെയ്യാനെത്തിച്ച 500 കിലോ അഴുകിയ കോഴിയിറച്ചിറച്ചിയാണ് കളമശ്ശേരിയില്‍ നിന്നും ഇന്നലെ പിടികൂടിയത്. റെയ്ഡിന് തൊട്ട് മുന്‍പും കേന്ദ്രത്തില്‍ നിന്ന് തട്ടുകടകളിലേക്കും ഹോട്ടലുകളിലേക്കും പഴകിയ ഇറച്ചി വിതരണം ചെയ്തിരുന്നുവെന്നാണ് കണ്ടെത്തല്‍.
ഇറച്ചി വില്‍പ്പന നടത്തിയ മണ്ണാര്‍ക്കാട് സ്വദേശി ജുനൈസിന് കളമശ്ശേരി നഗരസഭ നോട്ടീസ് നല്‍കി. കളമശ്ശേരി കൈപ്പുടമുകളിലെ വാടക വീട് കേന്ദ്രീകരിച്ചാണ് സുനാമി ഇറച്ചിയുടെ വിപണനം നടന്നത്. നാട്ടുകാരുടെ പരാതിയെ തുടര്‍ന്ന് ഉദ്യോഗസ്ഥര്‍ പരിശോധനയ്ക്ക് എത്തിയപ്പോള്‍ കണ്ടത് ഞെട്ടിക്കുന്ന കാഴ്ചയായിരുന്നു.
സുനാമി ഇറച്ചി പിടികൂടിയതിന് പിന്നാലെ കളമശ്ശേരി നഗരസഭാ പരിധിയില്‍ ഇന്നലെ വ്യാപക പരിശോധന നടന്നിരുന്നു. ഭക്ഷ്യസുരക്ഷാ വിഭാഗവും, കളമശ്ശേരി നഗരസഭയിലെ ആരോഗ്യ വിഭാഗവും ചേര്‍ന്ന് നടത്തിയ പരിശോധനയില്‍ രണ്ട് ഹോട്ടലുകള്‍ അടച്ചുപൂട്ടിച്ചു. പൈപ്പ് ലൈന്‍ റോഡിലുള്ള ഫലാസില്‍ ദുബായ്, ഡെയിലി മീറ്റ് എന്നീ കടകളാണ് പൂട്ടിച്ചത്.
ഡെയിലി മീറ്റ് എന്ന ജ്യൂസ് കടയില്‍ നൂറിലേറെ പാക്കറ്റ് പാലുകള്‍ ദിവസങ്ങളായി ഫ്രീസറില്‍ സൂക്ഷിച്ചിരിക്കുകയാണെന്ന് കണ്ടെത്തി. ഫലാസില്‍ ദുബായ് എന്ന ഹോട്ടലില്‍ നിന്നും ഭക്ഷണത്തില്‍ ചേര്‍ക്കുന്ന അനുവദനീയമല്ലാത്ത കളറുകള്‍ അടക്കം കണ്ടെത്തി, ഇവ ഭക്ഷണസാധനങ്ങളില്‍ ഉപയോഗിക്കുന്നതായും സ്ഥിരീകരിച്ചു. ഈ ഹോട്ടലിന് പ്രവര്‍ത്തിക്കാനുള്ള ലൈസന്‍സും ഉണ്ടായിരുന്നില്ല.
