കൊച്ചി> യൂറോപ്യന്‍ രാജ്യമായ ബെല്ജിയത്തില് നഴ്സുമാര്‍ക്ക് അവസരം. യോഗ്യത നേടിയവര്‍ക്ക് പ്രതിമാസ സ്റ്റൈപന്റോടെ ഡച്ച്‌ ഭാഷ സൗജന്യമായി പഠിച്ച്‌ ഉടന്‍ വിദേശത്തേക്കു പോകാന്‍ സംസ്ഥാന സര്‍ക്കാരിന്റെ റിക്രൂട്ടിങ് ഏജന്‍സിയായ ഓവര്‍സീസ് ഡെവലപ്മെന്റ് എംപ്ലോയ്മെന്റ് പ്രമോഷന്‍ കണ്സള്‍ട്ടന്‍സി ലിമിറ്റഡും (ഒഡെപെക്) എറണാകുളത്തെ ലൂര്‍ദ് ആശുപത്രിയും വഴിയൊരുക്കുന്നു.
ബെല്ജിയത്തില് നിന്നുള്ള ഡിഗ്നിറ്റാസ് കണ്‍സോര്‍ഷ്യവുമായി ചേര്‍ന്നുള്ള 'അറോറ' പദ്ധതിയുടെ ഭാഗമായാണ് നഴ്സുമാരെ സൗജന്യമായി റിക്രൂട്ട് ചെയ്യുന്നത്. പദ്ധതിയുടെ ഭാഗമായി നഴ്സുമാര്‍ക്ക് ആറു മാസം ദൈര്‍ഘ്യമുളള ഡച്ച്‌ ഭാഷാ പരിശീലനം സൗജന്യമായി നല്കും. ഇതോടൊപ്പം പ്രതിമാസം 11,000 രൂപ സ്റ്റൈപന്റും നല്കും. പുതിയ ബാച്ചിലേക്കുള്ള പ്രവേശനം 2023 ഫെബ്രുവരിയില്‍ ആരംഭിക്കുന്നു.
ഈ പദ്ധതിയുടെ ഭാഗമായി നേരത്തെ പരിശീലനം പൂര്‍ത്തിയാക്കിയ 37 നഴ്സുമാര്‍ ജനുവരി 20ന് ബെല്ജിയത്തിലേക്ക് തിരിച്ചു. ഈ നഴ്സുമാര്‍ക്ക് ലൂര്‍ദ് ആശുപത്രിയില്‍ യാത്രയയപ്പും നല്കി. ചടങ്ങില്‍ ഒഡെപെക് ചെയര്‍മാന്‍ അഡ്വ കെ പി അനില്കുമാര്‍ അധ്യക്ഷനായി. ഒഡെപെക് മാനേജിങ് ഡയറക്ടര്‍ അനൂപ് കെ എ, ലൂര്‍ദ് ഇന്‍സ്റ്റിട്യൂഷന്‍സ് ഡയറക്ടര്‍ ആന്‍ഡ് സീ ഇ ഓ ഫാദര്‍ ഷൈജു അഗസ്റ്റിന്‍ തോപ്പില്‍, ലൂര്‍ദ് ഹോസ്പിറ്റല്‍ അസോസിയേറ്റ് ഡയറക്ടര്‍ ജോര്‍ജ് സെക്വെര, ലൂര്‍ദ് ഇന്‍സ്റ്റിട്യൂഷന്‍സ് എച്ച്‌ ആര്‍ മേധാവിയും അറോറ പ്രൊജക്‌ട് മാനേജറുമായ അന്ന സിജി ജോര്‍ജ് എന്നിവര്‍ സംസാരിച്ചു. ആദ്യ ബാച്ചിലെ 22 നഴ്സുമാര്‍ പരിശീലനം പൂര്‍ത്തിയാക്കി ഇപ്പോള്‍ ബെല്ജിയത്തില് ജോലി ചെയ്തുവരുന്നു.
