പലരെയും അലട്ടുന്ന ഒരു ആരോഗ്യ പ്രശ്നമാണ് തലവേദന. ജീവിതത്തില്‍ ഒരിക്കലെങ്കിലും തലവേദന അനുഭവിച്ചിട്ടില്ലാത്തവര്‍ ഉണ്ടാകില്ല.
തല വേദനയെ പല വിഭാഗങ്ങളായി തരം തിരിച്ചിട്ടുണ്ട്. അതില്‍ തന്നെ പ്രൈമറി ഹെഡ് എയ്ക്ക് വിഭാഗത്തില്‍ പെടുന്നവ ഉണ്ടാകാന്‍ പ്രത്യേക കാരണങ്ങളൊന്നും കണ്ടെത്തിയിട്ടില്ല. അതേമയം ഉയര്‍ന്ന രക്തസമ്മര്‍ദം, സൈനസൈറ്റിസ്, അണുബാധ, തലച്ചോറിലെ രക്തം കട്ടപിടിക്കല്‍, മുഴകള്‍ മുതലായവയാണ് സെക്കന്ററി ഹെഡ് എയ്ക്കിന് കാരണമാകുന്നത്. അവ തിരിച്ചറിയേണ്ടതും ഉചിതമായ ചികിത്സ തേടേണ്ടതും പ്രധാനമാണ്.
പല തരത്തിലുള്ള തലവേദനകള്‍ ഏതൊക്കെയാണെന്ന് നോക്കാം.
1. ടെന്‍ഷന്‍ ടൈപ്പ് (Tension type headache): ഇത് നേരിയ തോതിലുള്ളതോ തീവ്രത കുറഞ്ഞതോ ആയ തലവേദനയാണ്. ടെന്‍ഷന്‍ ടൈപ്പ് തലവേദന ഉണ്ടാകുന്നവരില്‍ പലപ്പോഴും തലയ്ക്ക് ചുറ്റും ഒരു ഇറുകിയ ബാന്‍ഡ് ഇരിക്കുന്നതു പോലെ അനുഭവപ്പെടുന്നു. ഇത് ഏറ്റവും സാധാരണമായ തലവേദനയാണ്.
2. മൈഗ്രെയ്ന്‍ (Migraine): ഇത് തലയുടെ ഒരു വശത്തായാണ് അനുഭവപ്പെടുന്നത്. മരുന്ന് കഴിച്ചില്ലെങ്കില്‍ 72 മണിക്കൂര്‍ വരെ മൈഗ്രെയ്ന്‍ നീണ്ടുനില്‍ക്കുകയും ചെയ്യും. ഓക്കാനം, ഛര്‍ദ്ദി എന്നിവയും ഇതിനോടനുബന്ധിച്ച്‌ ഉണ്ടാകും. ഭക്ഷത്തോട് വിരക്തി, ഉറക്കം കുറയുക, മദ്യപാനം, തുടങ്ങിയ വികാരങ്ങളും മൈഗ്രൈന്‍ രോഗികളില്‍ സാധാരണയായി ഉണ്ടാകാറുണ്ട്.
3. ക്ലസ്റ്റര്‍ തലവേദന (Cluster headache): വേദനയുടെ തീവ്രത കാരണം ഇത് സൂയിസൈഡല്‍ തലവേദന (suicidal headache) എന്നും അറിയപ്പെടുന്നു. ക്ലസ്റ്റര്‍ തലവേദന ഉണ്ടാകുന്നവര്‍ക്ക് കണ്ണുകള്‍ക്ക് വേദന തോന്നുകയും കണ്ണില്‍ എന്തോ വെച്ച്‌ കുത്തിയതു പോലെ തോന്നുകയും ചെയ്യുന്നു. ക്ലസ്റ്റര്‍ തലവേദന ഉണ്ടാകുന്നവരുടെ കണ്ണും മൂക്കും ചുവക്കുന്നതും കാണാം
4. പോസ്റ്റ് ട്രോമാറ്റിക് (Post traumatic headache): തലക്കോ കഴുത്തിനോ പരിക്കേറ്റവരിലാണ് ഈ തലവേദന ഉണ്ടാകുന്നത്. പരിക്കുണ്ടായി ഏഴു ദിവസത്തിന് ശേഷം ഈ വേദന ആരംഭിക്കുകയും മാസങ്ങള്‍ വരെ നീണ്ടുനില്‍ക്കുകയും ചെയ്യാം. തലയുടെ മുന്‍ഭാഗം, തലയുടെ വശം അല്ലെങ്കില്‍ കഴുത്ത് എന്നിവിടങ്ങളില്‍ വേദന തോന്നാം.
5. മെഡിക്കേഷന്‍ ഓവര്‍ യൂസ് ഹെഡ് എയ്ക്ക് (Medication over use headache): പതിവായി വേദനസംഹാരികള്‍ ഉപയോഗിക്കുന്നവരിലാണ് ഇത്തരത്തിലുള്ള തലവേദന ഉണ്ടാകാന്‍ സാധ്യതയുള്ളത്.
6. സൈനസ് (Sinus headache): സൈനസ് ഉള്ളവരില്‍ കവിളിലും നെറ്റിയിലുാമണ് സാധാരണ വേദന തോന്നുന്നത്. ഇതിനോടനുബന്ധിച്ച്‌ പനി, മൂക്കടപ്പ്, എന്നിവയും ഉണ്ടാകാം.
ഇവ അവഗണിക്കരുത്
ഇടക്കിടെയുള്ള തലവേദന, ഉയര്‍ന്ന ബിപി , 50 വയസിനു മുകളിലുള്ളവര്‍ക്കുണ്ടാകുന്ന തലവേദന, ഗര്‍ഭാവസ്ഥയിലുള്ള തലവേദന, ഉറക്കത്തില്‍ നിന്ന് ഉണരുന്ന തരത്തിലുള്ള തലവേദന, അപസ്മാരം ഉള്ളവരില്‍ കാണപ്പെടുന്ന തലവേദന തുടങ്ങിയവയൊന്നും അവഗണിക്കരുത്. ഇത്തരം രോഗികള്‍ക്ക് അടിയന്തര ശ്രദ്ധയും ചികിത്സയും ആവശ്യമാണ്.
തലവേദനക്കുള്ള ചികിത്സകള്‍
തലവേദനക്കുള്ള അബോര്‍ട്ടീവ് (abortive) ചികിത്സയില്‍, രോഗലക്ഷണങ്ങള്‍ ഉണ്ടായാല്‍ രോഗി മരുന്ന് കഴിക്കുന്നു. പ്രിവന്റീവ് തെറാപ്പിയില്‍, തലവേദന ഉണ്ടാകുന്നത് തടയാനാണ് രോഗി മരുന്ന് കഴിക്കുന്നത്. രോഗികളുടെ പ്രായം, ലിംഗം, ലക്ഷണങ്ങള്‍, രോഗാവസ്ഥകള്‍ തുടങ്ങിയവയെ അടിസ്ഥാനമാക്കിയാണ് മരുന്നുകള്‍ തീരുമാനിക്കുന്നത്.
